JustinTukau

BIAU PENGABANG GAWAI PANGKUNG TIANG

Sa dua tiga empat
lima enam tuuuuujoh!
Nya alai aku ke bediri kaya-kaya,
Megai selanjau ijau manok banda,
Ukai laban aku bangat galak jegak lain baka.
Aku tu nunda adat lama kitai ke ari kalia selama iya.
Aku tu meri kita tabi, kedua iya adat basa,
Meda kita ke betuboh mua’ pemaioh betunga mua.
Kita tu endang datai ngena timpuh abis semaia;
Nadai alai kitai ngintai ka mimpi tinduk lina,
Nadai alai kitai ngintai ka igau diau di menoa.

Nyangka kita bisi kena sipat mimpi ringat,
Kena pansa mimpi bisa,
Leboh kita ke nepan bas niki kereta,
Semanjai jalai sebelah menoa.

Nyangka kita ke bisi laboh pimpin,
Ke bemain ba jalai raya,
Nyangka kita bisi raup ke ngelikup mansa mua.
Enti udah kena biau enggau selanjau ijau manok banda,
Nadai iya apa agi ko Petara,
Gerai nyamai ko Raja Selampandai.

Nya alai aku ke bediri tenjan-tenjan,
Tu megai selanjau ijau manok jelayan,
Ukai laban aku tu bangat galak jegak jelar-jelar;
Tang laban aku tu nunda adat lama,
Kitai ari kelia lama jeman.
Meda kita ke betuboh maioh bekaban,
Kita ke ulih ngambi dipadah pesan,
Bejanji ke ari chukup malam,
Besain ka minit ngena jam.

Nyangka kita bisi salah igau nyandau malam,
Bisi igau irau begawan,
Nyangka bisi sipat mimpi ringat kena pansa mimpi rawan,
Nyangka leboh kita ke nait bas niki mantuka,
Enggau di semanjai jalai sebelah utan,
Nyangka kita bisi salah pimpin ke bemain sabelah jalan,
Nyangka kita ke bisi labuh raup ke ngelikup kiba-kanan.

Enti kita udah dibiau aku enggau selanjau ijau manok jelayan tu,
Tabar iya laar buai ka bukai,
Nya alai ke tu lengka ka aku dulu jako nya.

Nya baru tak degi-degi anak kemali lelaki,
Tumbuh di tisi jalai raya.
Tu baru aku miau kita ngena biau sampi puji,
Lak ka iya tau nyadi saleka dua,
Amat penemu enggi tudah aku tu nadai tentu menuku manah didinga,
Tang enti kitai deka, tau ga iya dikena,
Enti kitai enggai, tau ga iya dibuai,
Enda ga iya jadi apa.