JustinTukau

Sa, Dua, Tiga, Empat,
Lima, Enam, Tuuuuujoh.

Enda aku busong ilang laya,
Megai langgai manok banda,
Kena aku miau ading piring pinang saleka,
Laban aku tu nampong jako sera nyawa,
Enggi aki kitai Rekaya,
Iya endang landik ngajar kitai bebasa,
Ka semua bala pengabang.

Enda aku busong laya pambu,
Megai langgai manok kelabu,
Kena aku miau ading piring kapu,
Laban aku tu endang nitih ka ajar nampong jako,
Enggi aki kitai Rekaya Jamban Atu,
Iya landik ngajar kitai bebasa ngena jako,
Nadai kala saru bekalih tunsang.

Dara Santih bunsu Sirih betumbok takang,
Serta enggau Dara Chelum Bunsu Tum Sedi lulun atas bedilang,
Dikentudi ka Dara Bagau Bunsu Semakau rendang dagang,
Tambah Dara Sandu Bunsu Gentu daun pisang,
Sama udah gempuru ditu datai magang.
Nya alai tambah Kumang Dara Simbut,
Bunsu Pulut Jantan Jentawang,
Tangkan ka penganan baka bulan rerak rumpang,
Champor letup baka tangkup bunga kejumpang,
Kentudi ka Endu Tematu Tali Betabu,
Bunsu Telu Manok indu kepayang mekang.

Nya alai letup pan udah ga chukop,
Asi pan udah ga bisi,
Pinang udah ga chukup magang,
Samoa perengka pan udah ga sedia,
Ditiap genap nadai timpang.

Nya baru aku ngangau ka sida ke tindok nakal singit,
Bejalai ngena burit,
Nya ga Bunsu Chapak Burak,
Ba-ukir ilak kesulai tandang.
Kita nya meh ka diasa nerima bala pengabang,
Diasoh nabi samoa orang.

Ninga munyi nya tak ketawa balat gaga,
Ading piring pinang saleka,
Laban udah dibiau enggau selanjau ijau manok banda,
Gaga nabi meri basa ngagai Petara,
Ke datai ari menoa iya di Tuchong Sandong Gemala,
Di bukit lilit Gerija,
Alai semuka dudok sembayang.

Ketawa gaga balat rindu ,
Pamping ading piring kapu,
Ensepi diri udah dibiau,
Enggau selanjau ijau manok kelabu,
Iya ga gaga nganti Apai Migu,
Datai ari munggu madang engkajang.

Tak ketawa tuchum Dara Chelum,
Bunsu Tum Sedi Lulun datas bedilang,
Ensepi diri udah dibiau,
Enggau selanjau ijau manok sigon,
Gaga nganti penatai Liba apai Dom,
Datai ari pun kara nurun maioh betunjang.
Tak depan-depan ketawa ading piring penganan,
Laban iya udah dikebau enggau selanjau manok jelayan,
Gaga nganti penatai Ini Andan,
Datai ari bulan ke meruan tuang-tuang,
Nya orang ke ngembuan ubat jadian mali langkang.

Ketawa gaga amat asi ketupat,
Laban udah kena biau enggau selanjau ijau manok kepiat,
Gaga nganti Kumang Dayang Sambat,
Indu orang di urat dandi nentang,
Nya ga indu pandai di pechunggai tunjok empat,
Landik ngebat tukang tengkebang.

Ketawa chaie-chaie ading piring sungki,
Ensepi diri udah kena kebau enggau selanjau ijau manok pungka laki,
Gaga nganti penatai Keling Aji,
Datai ari tuchong engkeraji padi,
Munyi negeri maioh orang,
Nya orang ke berani ati mutus kempang.

Piring rendai pan sama ketawa terai-terai,
Laban udah dibiau enggau selanjau ijau manok tawai,
Gaga nganti Bujang Rangkang Kirai,
Datai ari menoa iya di Tatai Tanah Nyadai,
Redai terabai rampai temiang.
Nya orang ke ngembuan keruntok tandok rusa mulai,
Ubat besai jadi ka ubat pengumbai mali langkang.

Ketawa gaga ading piring penganan jala,
Ensepi diri udah dikebau enggau selanjau ijau manok banda,
Gaga nganti Raja Simpulang Gana,
Datai ari menoa iya di Letong Jalong Temaga,
Tinggang bunga nuyan meranggang,
Nya orang ti ngembuan leka sesangga tepang.

Taong-taong munyi ketawa ading pimping piring tepong,
Ensepi diri udah di kebau enggau selanjau ijau manok tuntong,
Gaga nganti penatai Aki Lang Menaul Buban,
Datai ari engkeleman bulan mandang,
Aki Lang Menaul Tuntong,
Datai ari Kebong Langit Ngeruang,
Nya orang ke ngembuan batu pugu danau kampong,
Pengantong upong balang beraang.

Nya alai antu pan udah ga sampal nemu,
Padah ka magang,
Petara pan udah ga diasoh ninga,
Ngemata ka pengawa buah pemansang.

Nya alai lama kitai udah dudok bebandong,
Enggau Aki Lang Sengalang Burong,
Ke nyau be-ati deka pulai ngagai menoa iya empu,
Di kebong langit landong,
Ninggal ka kitai gempelu batu lua bekubu burong ketupong,
Jadi ka ubat mali rampong,
Ngasoh betampong tau serang.

Raja Simpulang Gana pan nyau madah ka diri deka pulai,
Ngagai menoa iya di Letong Jalong Temaga,
Ninggal ka kitai taring uting babi menoa,
Kena kitai ngintu simpuli padi paya,
Ngambi ka tak sebaka manah magang.

Nya alai Bujang Rangkang Kirai,
Nyau be-ati deka pulai, ngagai tatai tanah nyadai,
Ninggal ka kitai keruntok rusa mulai,
Ko iya tau ka ubat kena bumai mintar dandang.

Nya alai Aya Apai Migu,
Udu gaga balat rindu,
Laban iya udah ngabang ading priring telu,
Lalu ninggal ka kitai batu pupu gigi gumbang,
Nya ga ubat landik bejako,
Ba gulu tugong orang.

Apai Sabit Bekait pan udah ga ngabang ading piring pulut mit,
Lalu be-ati ransing gagit,
Pulai ka punggang tisi langit,
Lalu ninggal ka kitai batu pengait,
Dikena kitai ngulih ka duit mata wang.

Nya alai Keling pan udah ga datai bgabas samoa piring,
Be-ati deka pulai ngagai Tinting Kuning Gasing,
Ninggal ka kitai Taring Tengiling,
Tau ka ubat kena nyelinting,
Awak ka enda tepelanting jauh tekejang.

Kumang Dara Belangkat lama ga udah datai ngabas ading piring ketupat,
Gaga ati ransing amat,
Ninggal ka kitai batu takang bintang bekijap,
Enggau gempelu batu pukat empelawa nyentang.
Nya ga ubat jampat enggau ubat pengingat,
Dikena sida teruna dara nelap,
Awak ka landik ngebat tukang nengkebang.

Nya alai Selampandai udah ga lama datai,
Ari menoa iya di tatai tanah nyadai,
Seberai Sungai Wong Nunggang,
Ngabas ading piring rendai,
Nyau be-ati deka pulai,
Lalu ninggal ka kitai batu buah nyiur nyuntai,
Enggau batu bingka lia pulai.
Kenu ko iya nya ga ubat besai,
Enti sakit ngasoh gerai,
Enti seranta tau mudah bulih utai,
Serta ngasoh gayu guru gerai nyamai,
Lantang senang.

Nya alai Petara lama ga udah datai,
Ngabang ading piring penganan jala,
Ke udah dikebau enggau selanjau ijau manok banda,
Bedada nyala ngerang kepayang.
Diatu iya be-ati deka pulai,
Ke menoa iya di tuchong sandong gemala ke cherira tampak terang.
Iya lalu ninggal ka kitai batu sedan bulan pernama,
Enggau batu takang bintang tiga.
Nya ga ubat maioh pampang saribu guna,
Ubat penyangga nyawa,
Awak ka kitai panjai umor nguan menoa.