JustinTukau

Sampi Nugal

Oha..(3x)
Sapa ke nyapa enggai tetembu?
Sapa ke ngangau ke bebadu?
Endai…nadai di tanya, nadai di pinta, nadai dipadah, nadai ditelah nya deh.

Seduai (nama org) laban seduai ngelaboh ke padi pun, padi taun, padi sangking, padi puting ke saritu. Awak ke seduai bulih padi, bulih puli, bulih wang, bulih barang, bulih duit, bulih ringgit, awak ke seduai benama, awak ke seduai berita.

Keba’ pecah periuk tanah, ganti periuk betani, parai orang ke tuai, ganti tubuh kami, padam bulan ganti mata ari, keba’ kami tu baka tubok serul rebung, baka paku serul gelung. Bala rotan tampung danan, baka wi tampung tali, baka ijuk tampung penduk, baka lemba’ tampung ira’.

Ba…kada enda laya aku nyebut entua, kada enda layu nyebut ibuk, dini kak laya nyebut entua, dini kak layu nyebut ibuk, keba’ kaki enggi aku cegi-cegi berindik di seligi batu anggong, burit entam ngabit duduk di tikai tudung long, belakang kilang-kilang sanggit seludang baju burung. Lengan enggi aku melan-melan entam suram bentuk selong, pala luga-luga tata’ lala’ minyak balong, kening balut siring labung sekundong, debong unding ngetup selaing baja beliong.

Jari kanan tangkap di dan tapang rimbong, jari kiba miau suka’ manuk sabong, nya baru aku tau nyeru ngangau ngensong, ngangau ke orang di tuchong engkeranji ngandong bungkong kuyung-kuyung ngada ke benung tajau guci.

Ohaaaaaaaaaaa…
Kada enda tumpat tubuh jimat niti enturan jalai lendat, dini kak tumpat tubuh jimat niti enturan jalai lendat, keba kaki cegi-cegi berindik di seligi batu besapat. Burit entam ngabit duduk di tikai sapar empat, belakang kilang-kilang sangit seludang baju kebat, lengan melan-melan entam suran bentuk selong kawat, pala luga-luga tata’ lala’ minyak sipat, kening balut siring labong sekelat, labong unding ngetup selain baja amat.

Jari kanan tangkap di dan tapang berkawat, jari kiba’ miau ke suka’ manok ijau belalat, nya baru aku tau nyeru ngangau amat, ngangau ke orang di seregu rawu rarat baka lipat kajang apong kerenjong-renjong baka serungkong tajuk padi.

Bah…kada enda sulai tubuh besai niti enturan jalai landai, dini kak sulai tubuh besai niti enturan jalai landai, keba’ kaki cegi-cegi berindik di seligi batu umai, burit entam ngabit duduk di tikai tiku enseluai, belakang kilang-kilang sangit seludang baju kirai, lengan melan-melan entam suran, bentuk selong dawai. Pala luga-luga tata’ lala’ minyak minyai, kening balut siring labong unyai, dabong unding ngetup selaing baja makai.

Jari kanan tangkap di dan tampang bekumbai, jari kiba’ miau suka’ manuk ijau enseluai, nya baru aku tau nyeru ngangau ngumbai, ngangau ka orang di seregu rawu rangkai kepai-kepai baka bungai jelumpang tumbang.

Nya baru ngangau ke beragai lekai-lekai entelai landai malu nyedo, aram nugal saritu ka enda pia ngabas paong kitak empu, tanam berenjam tanah landai, dia padi nyadi di kaki nyentuk ke serarai lepai-lepai baka langai burung lemujan, ni kumang dayang berdai berumah di pah tatai panjai pansa bujang tuai mansang seruan.

Nya baru aku ngangau ke bekubu burek bulu burung ketupung junggut iko, aram nugal saritu ka enda pia ngabas paong kitak empu tanam berenjam tanah landong, dia padi nyadi di kaki nyentuk ke punjung di ujung galau tekam, ni kumang dayang riong berumah di pah kampung baong, senentang enggau batang tapang rindong jalai rangayong mansang bepelam.

Nya baru aku ngangau ke memuas burung bagas udu bejako, aram nugal saritu ka enda pia ngabas paong kitak empu, tanam berenjam tanah badas, dia padi nyadi ari kaki nyentuk katas, pating meranaing tangkai meringgas, baka pulas tekuyong kaban.

Nya baru aku ngangau ke kutuk retuk-retuk munyi ke nempa tincin engkerajo, aram nugal saritu ka enda pia ngabas paong kitak empu. Tanam berenjam tanah seduk di padi nyadi ari kaki nyentuk ke teluk, meda pating meranaing pucuk merabikok, kemeran entukan buban raja tucuk ni kumang dayang niok ngeretat ka kami ubat dian kena besimpan.

Nya baru abis pucuk tapang pucuk kedang pucuk kelampu pucuk kayu pucuk mikai pucuk ngelai pucuk tekam pucuk keladan, aku ngangau ke orang di munggok gulok lumpung tibang, tatai redai sengkenyang. Nya baru aku ngangau ke orang di langit mit mesai kepit bingkai tanggi, gerenjam bulan baka perdap daun api. Ngangau ke bintang dua bintang tiga ke belaki dini ari sepa jaga ngambi Jubang anak Naja mangkang ka nanga meriok langkang.

Kitak ke ari langit nyengok angka rekong, ke ari tanah nyengok angka rekong,
Iya ke ari ili mudik bedayong, iya ke ari ulu undur beratong.

Pia mega kitak anang datai pia, datai ngapa,
Mai pengaruh gembar tubuh,
Mai ubat sereba genap,
Mai batu lemak batu karak,
Batu asi batu ai,
Mai batu benda awak ke kami tampak rita seluruh dunya abis negeri,
Mai batu ikan awak ke kami melan-melan baka bulan tumbuh pagi.